Liem hu l-aħjar pajjiż biex nagħmel abort?

L-għażla tal-pajjiż fejn tivvjaġġa għal abort tiddependi fuq żewġ fatturi ewlenin: il-liġi tal-abort f'dak il-pajjiż u d-dokumenti tal-ivvjaġġar tiegħek.

Il-biċċa l-kbira tal-pajjiżi tal-UE, bl-eċċezzjonijiet notevoli tal-Polonja u Malta, jippermettu l-abort fl-ewwel trimestru tat-tqala. Ir-Renju Unit (UK) u l-Olanda għandhom liġijiet dwar l-abort partikolarment progressivi u jippermettu wkoll aborti fit-tieni trimestru (sa 24 ġimgħa fir-Renju Unit u sa 22-23 ġimgħa fl-Olanda). Ir-Renju Unit m'għandu l-ebda limitu f'każijiet fejn il-fetu għandu anomalija serja.

Il-limitu tal-abort fi Spanja huwa ta’ 14-il ġimgħa, u fl-Italja huwa ta’ 90 jum (bejn 12 u 13-il ġimgħa). Oqgħod attenta jekk tiġi offruta abort fi Sqallija. Kien hemm rapporti ta’ nisa li ħallsu diversi eluf ta’ Ewro għal abort fi Sqallija u kellhom tħassib serju dwar il-kwalità tal-kura li rċevew.

Jekk tgħix Malta, x'aktarx tkun jew ċittadina tal-UE, jew ċittadina ta' pajjiż terz b'Viża Temporanja (kategorija C) jew Viża Maltija fit-tul (kategorija D). Dawn kollha jippermettulek tivvjaġġa lejn pajjiżi taż-żona Schengen mingħajr burokrazija addizzjonali. Dawn huma l-pajjiżi li bħalissa jiffurmaw parti miż-żona Schengen: Awstrija, Belġju, Repubblika Ċeka, Danimarka, Estonja, Finlandja, Franza, Ġermanja, Greċja, Ungerija, Islanda, Italja, Latvja, Liechtenstein, Litwanja, Lussemburgu, Malta, Olanda, In-Norveġja, il-Polonja, il-Portugall, is-Slovakkja, is-Slovenja, Spanja, l-Isvezja, u l-Isvizzera.

L-aktar ommissjoni notevoli minn din il-lista hija r-Renju Unit, li mhuwiex parti miż-żona Schengen. Ir-Renju Unit għandu l-lista tiegħu ta’ nazzjonalitajiet li m’għandhomx bżonn viża biex jidħlu. Ċittadini Maltin u oħrajn tal-UE m’għandhomx bżonn viża biex jidħlu fir-Renju Unit, iżda minn Ottubru 2021 ir-Renju Unit m'għadux jaċċetta ID cards għall-ivjaġġar u jkollok bżonn passaport. Tista' tiċċekkja jekk għandekx bżonn viża tar-Renju Unit hawn: https://www.gov.uk/check-uk-visa